●我嘅心又喜我嘅心又慌！
●老馮！做乜突然間唱起胡不歸咁有雅興？
●之唔係關議員囉！
●即係點呀？
●關議員日前突然炮轟當局由於沒有城市發展總體規劃限制，官員只要依法，就能運用裁量權，決定工程或項目的審批與否，而有關審批是否符合公眾利益、是否符合環境保育，是否符合周邊居民利益，根本無需理會；這不但容易引發社會紛爭，更為官員不規則的操作制造溫床。佢引用，無論係二００六年八月，廢止《外港新填海區都市規劃章程》，大幅放寬該區多個地段的建築高度，令松山燈塔景觀遭受破壞的事件；還是年前氹仔舊城區原益隆炮竹廠對面一幅地段，獲批准興建超高層樓宇等；政府全部都是以「依法審批」作為回應。
●我明喇！你認為佢跟人口水尾！
●唔係喎！我認為佢可以同吳區二人共同陣線對行政當局嘅種種卑鄙手段加以責難絕對係好事，當然佢嘅責難只係賊過興兵，讓所有不公事情成為事實後，再發揮佢嘅「理性」批評，對唔少市民都會有市場，有助明年拉票之用。
●老馮，你咁講又唔啱，你可以話關議員議程前發言為拉票，人地都可以話吳區二人拉票！
●克仔，差得遠喇，直選議員為公眾提出為公益嘅質詢或者炮轟行政當局，絕對合理而且正常，但係如果好似關議員只係賊過興兵兼臨尾「清醒」，我就不能苟同！點解當局可以「依法」而行，只因立法會當橡皮圖章，吳區二人多次為公眾利益而提出聽證，請問關議員又做過Ｄ乜呀？可能佢投過棄權票，但係佢又講過乜嘢公道說話，唔好同我講佢因為組織關係唔可以亂講，如果黨性大於人性，點解佢好可以今次炮轟政府，唔通佢退咗黨？講明白就係因為小罵大幫忙，而組織需要佢扮下親民意，為咗明年選舉鋪路，希望選民要睇清真偽！
●你係咪為咗選舉所以咁嬲？
●有Ｄ啦，不過我最嬲係正報！
●點解呀？
●佢前兩日果份社論題目係：多少罪惡依法而行，而內文中：「「依法」、「依法」，多少罪惡假汝之名而行！立法會議員關翠杏昨日議程前發言說得何其「一針見血」！她引用松山燈塔景觀受破壞、益隆炮竹廠一度獲批興建超高層樓宇及現時被投訴的小潭山腳興建四十七層高豪宅為例
，反映官員在決策時，只以依法及技術是否可行的簡單標準審批，罔顧公眾利益，「依法審批」成為當局最好的擋箭牌，項目成事與否，發展商永遠成為最終的贏家！」
乜嘢一針見血，唔通Ｄ法律同關議員無關，點解歐文龍案發之後，立法會唔可以成立土地審批委員會，而要成立一個非人非馬嘅臨時土地乜乜小組，立法會點解會自廢武功，而關議員嘅組織立法會中已有不少票兼權力，如果要一針見血，請佢先針咗組織內部，請佢先公開批評組織內部，不過最難以接受就係正報，我一向好支持佢嘅方針，點解今次如次犬儒，係咪鼓勵更多嘅親政府力量出嚟講公道話，與吳區共同進退。
●係都唔定！
●關議員今次一針不過係機關算盡而得之，唔輕易再有下次！
●同意同意！
●你唔好以為我痴咗線，我好清醒，正報問：「「依法」、「依法」，多少罪惡假汝之名而行！」，我反問：「孰令致之？」清官清官，胡不歸呀？
人人齊心
力保民生
即使躊躇
要爭民主
