一個尋租活動（Renting）成功了，竟成了此間多家報紙嘅頭版頭條，其中有一家大報仲用咗差唔多整個頭版，圖文並茂加表格，做得好詳細添。不過小記可以肯定鄰埠香港媒體面對類似個案係唔會咁做嘅。

　　小記所說嘅尋租活動，係一啲團體為咗中小微型企業向政府尋求資助居然得咗。周四（二十六日）某大報大字標題：「政府二千萬扶中小微型飲食老店」。

　　小記話唔會咁做，係香港市民討厭搵著數者及搵數活動，而佢地有能力去判斷乜嘢係搵著數，乜嘢人係為咗向政府搵著數而損害公眾利益。報紙當然唔會公然得罪市民同埋讀者喇。

　　尋租就係搵著數。尋租既消耗資源。又毒害自由競爭嘅營商環境。

＊ 周三（二十五日）報紙版面，立法會嘅新聞頗多，除咁陳麗敏司長為咗退休高官搵著數嘅制度安排之外，議員嘅議程前發言亦佔咗唔少編幅。馮大炮今次發言夠晒出位，除咁為倒退嘅《勞動關係法》（草案）護航之外，仲力撐話澳門老闆拖欠薪金個案係鳳毛麟角添。但係咁啱得咁橋，周一就發生咗兩單不良僱主拖欠工人薪酬事件，仲成為周二報紙嘅頭條新聞添。