●老馮，我尋日聽完歐文龍家屬案件中，辯方律師嘅陳詞後，令我信心大增。

●信心大增？有乜令你信心大增？

●歐文龍案件中，被告劉春紅嘅代表律師周國強指出，有公務員曾在部分涉案工程的政府文件中簽名，但有關公務員並無成為被告及被處以刑責，因只是按上司指示辦事。基於公平原則，作為鄧儉民秘書的劉春紅應獲同樣對待。

●咁又點呀？

●即係話如果劉春紅被判有罪，即係之前未有被控嘅一眾公務員將會被控。

●點解？

●由於公平原則以及公眾壓力，我相信司法同廉政當局會對此重新審理！再加上助理檢察長陳子勁以「孤掌難鳴」來形容歐文龍受賄行為，如果沒有人行賄，不法行為就不會發生，因此指控歐文龍三親屬及鄧儉民等四人有罪。由此可見，一句孤掌難鳴就可以知道此等被告入罪可期。

●克仔，今次似乎到你有Ｄ唔懂，我明白呢批被告嘅結果完全可以預期，但係以現今行政獨大嘅情況下，是否可以將士大夫如同百姓一般看待，我老馮有保留，即如陳副局點解係被法官質疑下仍然可以當其辦公室主任，公信力已經欠奉，點解面不紅耳不熱地幹下去，又好似以前建設辦果個羅先生，佢亦只係證人，點解又會被人繳械，做其顧問，好簡單，一個有後台，一個後台畀人拆左，否則，二人都可以獲得公平對待，公平地與百姓有分別地對待。

●老馮，今日講野又幾有紋路喎！

●唔係你估！仲有呀，正如陳子勁所講孤掌難鳴，究竟同歐文龍[合拍]嘅孤掌又喺邊呢？究竟歐文龍嘅另一掌係咪主要依賴現時嘅案中被告，以至尚未被告嘅相關涉嫌人士以至曾經承認修改評標分數嘅開標委員，相信大家都明白絕對唔係，而係現在仍然食緊雲石蛋糕果位兄台，不過我睇嚟，呢個孤掌都好難伏法，唯有睇下中央政府嘅行動。

●老馮今日講野脫胎換骨！有Ｄ料到喎！

●有咩料到吖，從立法會將政制改革降格為選舉法修正之後，我對澳門前途變得有Ｄ灰，再加上政壇近呢半年妖魔頻現，所以就勞騷左Ｄ。依家只有期望快Ｄ換屆，希望換屆換出一個[人]嘅管治澳門，千祈唔好再搵雲石先生Ｄ團伙，否則我只好移民。

●老馮，我諗有此同感嘅人唔少，奈何咁嘅政治制度，只可以選出由中央政府祝福嘅候選人，而上次個果就證明中央跌眼鏡，出晒事，所以下次果個究竟係點，我都不予厚望。

●克仔，其實我地係咪要努力將直選席位推畀真心為民主為澳嘅人。

●係，不過正如陳子勁所言，孤掌難鳴，更何況立法會上有個姑媽呢！

●又係佢！下次傾過！

 人人齊心 力保民生 即使躊躇 要爭民主