●老馮！老廉又衰咗喇！

●你梗係又話佢賊過興兵，歐文龍大案發生咗咁耐，先至話要嚴格管制批地，先至話行賄罪成嘅公司唔可以再參與投標政府工程，又想話老廉舉報率升就話成功增加市民投訴嘅信心，舉報率降就話澳門嘅廉潔程度有改善，以上嘅你都講過好多次，年年都講單單案都重複批評咁滯，好悶啫！

●老馮，我都知成日講會令大家好悶，所以今次就講Ｄ新野，不過咁，由你把口將老廉嘅失敗以及失職重述一次，一來唔會畀人話我三幅被，二來又可以提醒一下老廉主持張裕專員，我地仍然前事不忘，希望成為佢後事之師！

●大吉利士咩，後事！好喇，老廉又衰乜呀？

●衰多事囉！

●邊單事呀？

●明年選舉囉！

●明年選舉咁快有人做野，邊個係事主呀？

●之唔係愛國殷商尊貴議員馮志強囉！

●克仔，你又亂噏喇！雖則我地叫做有人噏野，不過今時今日馮官人地位顯赫，小心又收律師信！

●你講緊乜呀？我講嘅事主係尊貴嘅馮翁日前喺立法會內務會議上以第二常設委員會主席嘅身份，對於由陳司長提出嘅選舉委員會中選舉委員由五人增至七人，而且必須包含廉署人員一事，認為是否有必要，增加廉署人員，會唔會令到某Ｄ部門職權氾濫，馮翁認為廉署嘅職權係有佢嘅範圍，呢Ｄ咁嘅公正性選舉，有無必要一定要將廉署擺喺入面，佢感覺到有Ｄ機關嘅權限越嚟越氾濫，大家都感覺到，係唔按一定嘅程序去做野，因此當時表情非常不滿。

●我同馮翁雖然係老同，但係我認為身為第二常設委員會主席嘅佢，認為有的放矢，如果佢認為老廉做野有時係唔按程序，佢就應該舉出例子，令佢地好好改正，正如佢所講，既然選舉係公正嘅事，由以公正為目標嘅廉正公署去參與，有何不妥？

●其實馮翁鬧得啱架，零五年嘅選舉中，有一隊看似法輪功代表嘅黃衣人，喺選舉期間行為不檢，結果被告，而呢群黃衣人咁啱又同一位參選人有關，而呢位參選人又事先張揚，投票前已經話有位何姓朋友幫佢召集咗七千鄉親投佢一「標」！結果畀佢「不幸」言中，得標七千多，所以一直被傳佢買票，不過傳言歸傳言，我唔相信呢位先生買「標」嘅，因為佢一睇就知係「好人」！所以後來呢幫人被廉署傳召以至更高層嘅人被傳召前，完全唔識傳個電話通知下，等人地有個心理準備，似乎係唔按澳門嘅一向人情程序辦事噃。

●喂，立法會好似有一個好似你講嘅人噃，唔好再講喇！

●我都話你唔識野，你知唔知道你個姓同何姓來頭不少，你唔可以咁唔尊重架！

●我真係唔知，不如你講嚟聽下。

●話說司馬光被抄家後，司馬族姓南逃，一族改姓何，一族改姓馮，所以何馮本一家，而且同屬司馬，而司馬氏原出於管理軍隊職位嘅人，而後獲賜姓司馬，所以你睇下今日姓何喺澳門幾威，姓馮又幾威！

●我都唔知祖先威成咁，不過話時話，抄家南逃都唔係好威啫！

●老馮，唔好講Ｄ衰野，歷史唔一定重演嘅，總之，張專員注意下馮翁嘅意見，講到底佢都係「民詫代表」吖！

人人齊心 力保民生 即使躊躇 要爭民主